نظامیان روسی و تاجیکستانی روز سه شنبه مشق و تمرین مشترک نظامی را در نزدیکی مرز افغانستان – تاجیکستان آغاز کردند.
وزارت دفاع تاجیکستان با نشر اعلامیه‌ای گفته است که بیش از ۱۰ هزار نظامی، عمدتاً نظامیان احتیاط تاجیکستانی، در این مشق و تمرین شرکت دارند.
اعلامیه حاکی است که نظامیان در یک سناریوی خیالی"امحای تندروانی را که از افغانستان وارد تاجیکستان می‌شوند" تمرین خواهند کرد.
اردوی روسیه گفته است که ۴۰۰ نظامی آن کشور با حدود ۸۰ تجهیزات از یک پایگاه نظامیان روسی در تاجیکستان به محل انجام این تمرینات اعزام شده اند.
این تمرینات در امتداد مرزهای ولایت بدخشان افغانستان با تاجیکستان انجام شده و قرار است تا روز جمعه ادامه یابد.
به دنبال کاهش حضور نظامیان خارجی در افغانستان، هر دو کشور –روسیه و تاجیکستان – همکاری نظامی خود را بیشتر ساخته اند.
شماری از نظامیان امریکایی می گویند که روسیه طالبان افغان را حمایت می‌کند، هرچند مقام‌های روسی بار بار این اتهامات را رد کرده اند.
اما روسیه بیش از آنکه از فعالیت طالبان در افغانستان ابراز نگرانی کرده باشد، همواره نگرانی خود را در مورد گسترش حضور و فعالیت تندروان گروه دولت اسلامی یا داعش در افغانستان به ویژه ولایت های شمالی آن کشور ابراز کرده است.
ماه گذشته، نمایندۀ روسیه در سازمان ملل متحد گفته که حدود ده هزار جنگجوی داعش در افغانستان فعالیت دارد و تاکید کرد که حکومت افغانستان باید داعش را در ولایت شمالی آن کشور ریشه کن سازد.
این بار نخست است که تمرینات نظامی در ولایت بدخشان تاجیکستان راه اندازی می‌شود، جاییکه در سال ۲۰۱۲ شاهد درگیری میان قوای حکومتی و تندروان شورشی بود.
نظامیان تاجیکستانی در گذشته نیز تمرینات نظامی را در ولایت ختلان – هم مرز با افغانستان – انجام دادند.
از سوی دیگر، چین معاونت امنیتی و نظامی خود را با تاجیکستان در این اواخر بیشتر کرده است و در مرز ۱۳۰۰ کیلومتری میان افغانستان و تاجیکستان زیربناها و تاسیسات امنیتی ساخته است. چین و تاجیسکتان نیز در سال ۲۰۱۶ تمرینات مشترک نظامی انجام دادند.
مرز افغانستان و تاجیکستان یکی از مسیرهای قاچاق مخدارات از افغانستان به کشورهای آسیای میانه و اروپا است.
