روسیه امروز ۱۱ سپتمبر (۲۰ سبنله) در حالی به تاجیکستان وسایط زرهی و تجهیزات نظامی فرستاد که مسکو تلاش دارد تدابیر امنیتی در مرز‌های جنوبی این کشور با افغانستان را تقویت کند.
پس از خروج نیروهای امریکایی و تصرف افغانستان توسط طالبان، مسکو در تاجیکستان تمرینات نظامی را راه اندازی کرده و پایگاه‌های نظامی خویش را تقویت کرد.
روسیه از سرازیر شدن احتمالی تندروان اسلامی به کشورهای آسیای مرکزی نگران بوده و در پی ایجاد سپر دفاعی در جنوب تاجیکستان است.
یوفژینی تسندیاکین، جنرال روسی در یک اعلامیهٔ وزارت دفاع این کشور گفته است که علیه بی‌ثباتی در حال رشد در نزدیکی مرز جنوبی تاجیکستان و برای امنیت تاجیکستان و روسیه، مسکو با دوشنبه یک جا کار می‌کند.
انتقال وسایل نظامی که تجهیزات محاربهٔ نزدیک و وسایل محافظتی نیز در آن شامل است، قابلیت‌های نظامی تاجیکستان را به گونهٔ چشمگیر تقویت کرده و عصری می‌سازد.
تاجیکستان در حدود ۱۳۴۴ کیلومتر مرز مشترک با افغانستان دارد که کوهستانی بودن آن کنترول آن را دشوار می‌سازد.
در جریان تصرف افغانستان توسط گروه طالبان، شمار زیادی از نظامیان افغان به تاجیکستان پناه برده بودند. این در حالی است که اکنون نیز غیرنظامیان افغان تلاش دارند به این کشور پناهنده شوند.
