برای اولین بار در هفتهٔ مود تاجیکستان که اخیراً در شهر دوشنبه، پایتخت تاجیکستان، برگزار شد، شماری از زنان افغان با نمایش طرح‌های لباس‌های ملی افغانستان اشتراک کردند.
در این نمایشگاه سالانه، طراحان و نمایندگان برندهای مختلف از تاجیکستان و دیگر کشورها، کارهای خود را به نمایش می‌گذارند و آخرین فصل آن علاقمندان زیاد مود و فیشن را به خود جلب کرد.
بیشتر لباس های افغانی در این نمایشگاه، به شکل مدرن طراحی شده بود.
منیژه فاطمی، طراح افغان و یکی از اشتراک کنندگان نمایشگاه به صدای امریکا گفت: "ما بار اول است که در هفته مود تاجیکستان اشتراک میکنیم، بسیار خوشحال هستیم که با ما چنین فرصت داده شد و ما تشکر میکنیم از دوستان تاجیک مان که ما را دعوت کردند که ما هم در اینجا اشتراک داشته باشیم."
برای ۱۲ طراح افغان ساکن تاجیکستان که در این نمایشگاه اشتراک داشت، از طرف کارشناسان و طراحان تاجیک، به مدت دو هفته برنامهٔ آموزشی برگزار شد.
ملکه یاربابایوفا، مشاور بین المللی وزارت صنعت و تکنالوژی جدید تاجیکستان، می‌گوید که در این برنامه به اشتراک کنندگان افغان راه‌های بازاریابی برای محصولات شان، به خصوص در فضای مجازی آموزش داده شد.
او گفت: "صرف نظر از آنکه، این پناهجویان در تاجیکستان می‌مانند یا نه، تجربه حاصل شده از اشتراک در این برنامه و کار آموزی، در هرجایی که باشند، برای شان کمک می‌کند."
فصل جدید هفته مود تاجیکستان تحت شعار "دوستی خلق‌ها" برگزار شد که برعلاوهٔ نمایش طرح‌های جدید طراحان و قدردانی از لباس های بومی، یک فرصت برای معرفی چهره های جدید در بخش مود در تاجیکستان تلقی می‌شود.
در این نماشگاه انواع مختلف لباس‌های تاجیکی به نمایش گذاشته شده است. ویس اسایوف، طراح لباس تاجیکستانی گفت: "کلکشنی که من آماده کرده ام... 'سایه های تاریخ' نام دارد، برای چی سایه‌های تاریخ نامیدم؟ برای اینکه که کوتاه به شکل نمایش در مورد تاریخ لباس های قدیمی تاجیکستان حرف میزنم."
در این فصل هفته مود تاجیکستان بیش از ۳۰ طراح و برند های تاجیکی و بین المللی طرح های خود را به نمایش گذاشت.
