حکومت افغانستان برای جلوگیری از گسترش کروناویروس تمامی مکاتب و پوهنتون‌های دولتی و خصوصی را مسدود کرد.
وحید عمر، رییس اداره ارتباطات عامه و استراتیژیک ریاست جمهوری و مشاور رییس جمهور افغانستان در یک تویت نوشته است: "به اساس پیشنهاد مشترک وزارت های صحت عامه، معارف، تحصیلات عالی و اطلاعات و فرهنگ و منظوری رییس جمهور، تمام موسسات تعلیمی دولتی و خصوصی الی تاریخ ۳۰ حمل ۱۳۹۹ تعطیل گردیدند."
حکومت افغانستان در حالی این اقدام را روی دست می‌گیرد که شمار واقعات کروناویروس در این کشور به ۱۱ رسیده است.
حکومت افغانستان همچنان جشن سال نو خورشیدی و مسابقات ورزشی را لغو کرده است.
بر اساس گزارش ها، بیش از ۱۳۸ هزار نفر در سرتاسر جهان به کروناویروس مبتلا شده و بیش از ۵۰۰۰ نفر تا اکنون جان باخته اند.