وزارت داخلۀ تاجیکستان گفته است که چهار گردشگر خارجی هنگام بایسکل رانی در حومۀ جنوبی شهر دوشنبه در یک رویداد ترافیکی کشته شده است.
مقام‌های تاجیکستانی گفته اندکه دو شهروند امریکایی، یک سویسی و یک هالندی در این رویداد کشته شده و یک شهروند دیگر سویسی، یک هالندی و یک فرانسه‌ای زخمی شده اند.
به گفتۀ مقام‌ها تا کنون کم از کم سه نفر به ظن دست داشتن در این قضیه بازداشت شده است. مقام‌ها همچنان گفته اند که یکی از مظنونان هنگام بازداشت مقاومت می‌کرد. به گزارش رسانه های محلی تاجیکستان مظنونان با خود چاقو نیز حمل می کردند.
خبرگزاری رویترز از قول مقام‌های تاجیکستانی گزارش داده است که یکی از زخمی شدگان جراحت ناشی از ضربۀ چاقو نیز در بدن دارد.
مقام‌های تاجیکستانی گفته اند که رانندۀ موتر که هویت وی تا هنوز شناسایی نشده است با کاروان این گردشگران که همه سوار بر بایسکل بودند تصادم کرده اند.
رمضان رحیمزاده، وزیر داخلۀ تاجیکستان در یک کنفرانس خبری گفته است که در پیگرد این رویداد همه احتمالات – تصادم، سرقت یا هم دهشت افگنی – بررسی خواهد شد.
سفارت ایالات متحده در دوشنبه با انتشار خبرنامه‌ای این رویداد را تایید کرده اما در مورد هویت شهروندان امریکایی معلومات نداده است. اعلامیۀ سفارت امریکا نیز ماهیت عمدی این رویداد را نفی نکرده است.