مقامات در تاجیکستان روز دوشنبه ۲۸ اگست (ششم سنبله) گفتند که در اثر لغزش زمین ناشی از بارندگی شدید کم از کم ۱۳ نفر جان باختند.
وزارت مبارزه با حوادث طبیعی تاجیکستان اعلام کرد که چندین رویداد لغزش زمین در نزدیکی دوشنبه، پایتخت این کشور، رخ داده است.
دفتر امام علی رحمان، رییس جمهور تاجیکستان، در یک بیانیه گفت: "روز گذشته پس از بارندگی شدید، یک فاجعه طبیعی رخ داد که در نتیجه آن ۱۳ نفر جان باختند."
این دفتر گفته است که ۱۱ نفر در ساحۀ وحدت و دو نفر در منطقهٔ رودکی جان باخته اند.
وزارت مبارزه با حوادث طبیعی تاجیکستان هشدار داده است که خطر واقعات بیشتر لغزش زمین وجود دارد.
رانش زمین در جاده میان دوشنبه و خجند در منطقه ورزوب تاجیکستان شماری موترها را واژگون کرده است.
تاجیکستان، فقیرترین کشور اتحاد جماهیر شوروی سابق در آسیای مرکزی، در برابر آفات طبیعی آسیب پذیر است.
در ماه فبروری، در منطقهٔ کوهستانی گورنو بدخشان در نزدیکی مرز افغانستان ده ها واقعۀ برف کوچ و لغزش زمین رخ داد.