ارگ می‌گوید که محمد اشرف غنی، در سفرش به عشق‌آباد معاهدۀ استراتیژیک را با همتای ترکمنستانی‌اش امضا خواهد کرد.
بر اساس معلومات ریاست جمهوری افغانستان، برعلاوۀ این معاهده، نُه موافقتنامۀ دیگر نیز میان مقام‌های افغان و ترکمنستانی در بخش‌های مختلف امضا می‌شوند.
هارون چخانسوری، سخنگوی ریاست جمهوری افغانستان گفت: "همچنان در حضورداشت رئیس جمهور افغانستان و رئیس جمهور ترکمنستان سندهای متعدد همکاری و تفاهمنامه امضا شود که مهمترین آنها سند همکاری در بخش خط آهن است، نفت و گاز، فرهنگی و همکاری‌های گمرکی".
رئیس جمهور افغانستان، برعلاوۀ دیدار با قربان‌قلی بردی محمدوف، رئیس جمهور ترکمنستان، در انستیتوت روابط بین‌الملل وزارت خارجۀ آن کشور سخنرانی نیز خواهد کرد.
رئیس جمهور غنی، شام چهارشنبه در رأس هیأت بلندپایه دولتی، به ترکمنستان سفر کرد.