مسوولان صحی ولایت بغلان می‌گویند که از اثر همکاری جوانان و عالمان دین در آگاهی‌دهی عامه و تطبیق کمپاین‌های ضد پولیو، شماری زیادی از کودکان این ولایت واکسین ضد پولیو دریافت کرده اند.
مسوولان صحی از تلاش‌های عالمان دین و جوانان در راستای تطبیق واکسین ضد پولیو در ولایت بغلان قدردانی کرده و از آنان می‌خواهند که همکاری خود را در آینده نیز گسترش دهند.
داکتر فیصل، مسوول برنامۀ معافیت کتلوی ریاست صحت عامه ولایت بغلان، به صدای امریکا گفت: "ما به همکاری جوانان، عالمان دین و بزرگان قومی قادر شدیم که کمپاین‌های موفقیت‌آمیز خانه به خانه داشته باشیم، و از آنها می‌خواهیم که به تلاش‌های آگاهی‌دهی شان در مناطق دور‌دست ادامه دهند."
در عین زمان، شماری از جوانان ولایت بغلان نیز می‌گویند که آنها در مورد فواید واکسین ضد پولیو به خانواده‌ها آگاهی داده اند و با رضاکاران در راستای تطبیق واکسین به کودکان زیر سن پنج سال همکاری همه‌جانبه کرده اند.
رحیم‌الدین، یک تن از جوانان رضاکار ولایت بغلان، به صدای امریکا گفت: "در گذشته خانوادۀ ما به تطبیق واکسین ضد پولیو به کودکان توجه نداشت. پس از آنکه من در مورد فواید واکسین به آنان آگاهی دادم، هیچگاه در تطبیق واکسین تعلل نکرده اند."
فتانه متوکل، محصل ژورنالیزم پوهنتون بغلان، نیز می‌گوید که خانواده اش را تشویق کرده است که تمام کودکان زیر سن پنج سال را در برابر پولیو واکسین کنند، تا از فلج دایمی نجات یابند.
ویروس پولیو هنوز هم از کودکان افغان قربانی می‌گیرد، اما مقامات صحی افغان و شرکای بین‌المللی آنها به این باور اند که در آیندۀ نزدیک به همکاری گستردۀ مردم این بیماری از افغانستان ریشه‌کن خواهد شد.
