مقام‌ها در تاجیکستان از بازداشت ۱۱۳ نفر به اتهام داشتن عضویت گروه اخوان المسلمین خبر داد.
یوسف رحمان، لوی سارنوال تاجیکستان امروز ۲۸ جنوری (هشتم دلو) گفت که این افراد در جریان مار روان توقیف شده اند که دو شهروند خارجی، یک مقام شاروالی و بیش از ۲۰ استاد پوهنتون شامل بازداشت شدگان اند.
فعالیت گروه اخوان المسلمین در تاجیکستان ممنوع است.
در سال‌های اخیر، تاجیکستان به سرکوب گروه های مخالف اسلامی پرداخته، حزب نهضت اسلامی تاجیکستان را ممنوع قرار داده و رهبری آن حزب را به راه اندزای کودتا متهم کرده است.
تاجیکستان همچنان گروه های اسلامگرا و گروه دهشت افگنی دولت اسلامی (داعش) را به حملات اخیر در آن کشور مقصر خوانده است.
گروه داعش مسوولیت حمله بر محافظین مرزی تاجیکستان را در نومبر سال گذشته بر عهده گرفت که در آن دو تن از نیروهای تاجیکستانی کشته شدند.
این گروه دهشت افگن همچنان مسوولیت حملۀ ماه اگست سال ۲۰۱۸ بر گردشگران اروپایی و امریکایی در تاجیکستان را به دوش گرفته بود.
در آن رویداد چهار گردشگر خارجی –دو امریکایی، یک سویسی و یک هالندی- کشته و سه گردشگر دیگر –یک سویسی، یک هالندی و یک فرانسه‌ای- زخمی شده بودند.
