تاجیکستان می گوید که برای پذیرفتن حدود ۱۰۰ هزار پناهجوی افغان آمادگی می گیرد.
این در حالیست که با تشدید جنگ در ولایت‌های شمالی افغانستان، نگرانی‌ها در مورد بی‌جا شدن و فرار افغان‌ها از خانه‌های شان افزایش یافته است.
امام علی ابراهیم زاده، معاون کمیته پاسخگویی به حالات اضطراری تاجیکستان امروز جمعه ۲۳ جولای (اول اسد) گفت که کشورش برای ذخیره مواد ضروری لازمی برای پناهجویان احتمالی، دو ذخیره گاه بزرگ را در مناطق مرزی تاجیکستان با افغانستان اعمار کرده است.
با تصرف برخی ولسوالی‌ها در شمال افغانستان توسط طالبان، برخی نظامیان و غیرنظامیان افغان به تاجیکستان پناهنده شده اند.
در جریان ماه جاری، صدها غیرنظامی افغان به تاجیکستان پناه برده اند، اما دوشنبه می‌گوید که این شهروندان افغان دوباره به افغانستان برگشته اند.
این در حالی است که روسیه تانک‌های خویش را در نزدیکی مرز تاجیکستان- افغانستان مستقر کرده و قرار است از پنجم تا دهم اگست تمرینات نظامی مشترک را با تاجیکستان و اوزبیکستان در آنجا انجام دهد.
پیش از این، امام علی رحمان، رییس جمهور تاجیکستان دستور استقرار ۲۰ هزار نظامی را در مرز با افغانستان داده بود.
با آغاز روند خروج قوای خارجی از افغانستان که قرار است تا تاریخ ۱۱ سپتمبر تکمیل شود، حملات طالبان در افغانستان به ویژه ولایت‌های شمالی آن کشور که با کشورهای آسیای مرکزی هم مرز است، شدت گرفته است.
