حکومت افغانستان می‌گوید که حکومت اوزبیکستان نرخ برق صادراتی خویش را به افغانستان دونیم سنت دالر امریکایی کاهش می‌دهد.
دفتر مطبوعاتی ریاست جمهوری افغانستان می‌گوید که شام یکشنبه در دیدار محمداشرف غنی، رئیس جمهور این کشور با عصمت‌الله ایرگاشیف، نماینده خاص اوزبیکستان برای افغانستان، این توافق صورت گرفت.
ریاست جمهوری افغانستان می‌گوید که پس از ماه جولای سال جاری میلادی نرخ فی کیلووات برق وارداتی اوزبیکستان به ۵ سنت دالر امریکایی کاهش می‌یابد.
وحیدالله توحیدی، سخنگوی شرکت برشنا به رادیو آشنا – صدای امریکا گفت که در حال حاضر قیمت فی کیلووات برق وارداتی اوزبیکستان به افغانستان، ۷.۵ سنت دالر امریکایی است.
آقای ایرگاشیف در رأس یک هیأت اوزبیکستانی روز گذشته به کابل سفر کرد.
افغانستان هرسال ۳۰۰ میگاووات برق در جریان فصل سرما از اوزبیکستان وارد می‌کند و در فصل گرما این مقدار به حدود صد میگاووات کاهش می‌یابد.
اما به عوض آن، در هفت ماه فصل گرما، افغانستان از تاجیکستان ۳۰۰ میگاووات برق وارد می‌کند.
آقای توحیدی، سخنگوی شرکت برشنا گفت که تاجیکستان نسبت به اوزبیکستان، برق را با نرخ ارزان‌تر به افغانستان می‌فروشد.
به گفته آقای توحیدی، در فصل سرما میزان برق در تاجیکستان کاهش می‌یابد، به همین دلیل افغانستان برق مورد نیاز خود را از اوزبیکستان وارد می‌کند.
آقای ایرگاشیف در دیدار با رئیس جمهور غنی، در مورد کنفرانس تاشکند که در ماه گذشته برگزار شده بود و نشست دوم پروسۀ کابل نیز صحبت کرد.
دفتر مطبوعاتی ریاست جمهوری می‌گوید که در این دیدار، رئیس جمهورغنی گفته است که برای تعقیب تصامیم کنفرانس پروسه کابل و تاشکند، دوگروه کاری از نمایندگان افغانستان و اوزبیکستان برای کار روی مسایل سیاسی و همکاری‌های اقتصادی ایجاد گردد.
آقای ایرگاشیف با محمدحنیف اتمر، مشاور شورای امنیت ملی افغانستان نیز در مورد نتایج کنفرانس تاشکند صحبت کرده است.