شماری از دهقانان ولایت بامیان می‌گویند که معتادان مواد مخدر با تجمع روی کشت‌زارهای کچالو، حاصلات آنان را تخریب می‌کنند.
آنان می‌گویند که معتادان بخشی از حاصلات کچالو را در ساحات پشت بازار بامیان نابود کرده اند.
ظریف، یکی از دهقانان مرکز بامیان می‌گوید "از هر ولایت معتاد آمده این‌جا. یکی دو نفر نیستند، این‌ها را که دولت سرزنش نکند ما نمی‌توانیم".
علی جمعه، یکی دیگر از دهقانان می‌گوید که معتادان کچالوها را دزدی و در بازار به فروش می‌رسانند.
اما پولیس بامیان می‌گوید که به شکایت‌های دهقانان رسیده گی کرده و معتادان از کشت‌زارهای کچالو جمع‌آوری شده اند.
حسین نظری، کارشناس مبارزه با مواد مخدر پولیس بامیان می‌گوید "حالا که آغاز فصل برداشت کچالو در بامیان است و ما تلاش می‌کنیم که هیچ ضرری از ناحیۀ معتادان به دهقانان نرسد".
پولیس بامیان می‌گوید که برنامه جمع‌آوری معتادان ادامه خواهد یافت تا آسیب این معتادان به باشنده گان این ولایت نرسد.