مسوولان صحی ولایت تخار می‌گویند که در این ولایت تنها یک شفاخانهٔ ویژه معتادان فعالیت دارد که سالانه زمینه‌ٔ درمان ۳۲۰ معتاد مواد مخدر را فراهم می‌سازد.
داکتر سیدمحمد جلال، رییس شفاخانه ۴۰ بستر معتادان ولایت تخار می‌گوید که امسال بدلیل شیوع ویروس‌کرونا پذیرش معتادان را محدود ساخته بودند، اما اکنون ظرفیت این شفاخانه را پانزده درصد افزایش داده اند تا به هدف درمان ۳۲۰ معتاد در سال برسند.
او گفت "در این شفاخانه مریضان هم داخل بستر و در خارج از بستر و در سه دورهٔ تفکر، دیتاکس و دورهٔ بازتوانایی در مدت ۴۵ روز مورد تداوی قرار می‌گیرند. ما سالانه ۳۲۰ معتاد را تداوی می‌کنیم".
رییس شفاخانه معتادان ولایت تخار می‌گوید که برنامه‌های ورزشی، موسیقی و سرگرمی نیز بخشی از پروسه درمان معتادان را در این شفاخانه تشکیل می‌دهند و این برنامه‌ها نتایج خوبی داشته اند.
داکتر سیدمحمد جلال می‌گوید " ما در این شفاخانه برنامه‌های ورزشی، موسیقی، کرمبول، شترنج، دوش و آگاهی‌دهی را نیز به مریضان داریم، اما فقر و بیکاری و نبود شغل برای معتادان درمان شده، ارقام معتادان مواد مخدر را افزایش داده اند".
بربنیاد آمارها، در حال حاضر حدود بیست هزار مصرف کننده مواد مخدر در ولایت تخار می‌برند.