مسوولان صحت عامهٔ ولایت بدخشان می‌گویند که بربنیاد آمارها، نیمی از معتادان مواد مخدر را در این ولایت زنان و کودکان تشکیل می‌دهند.
سعیده سیدی، مدیر کاهش تقاضای مواد مخدر صحت عامه بدخشان می‌گوید که در حال حاضر ۲۵ تا ۳۵ هزار مصرف کننده مواد مخدر در این ولایت بسر می‌برند که حدود ۱۵ هزار آنان زنان و کودکان اند.
او گفت "شاید از سی هزار معتاد بین هشت هزار الی ده هزار آنان را خانم‌ها تشکیل بدهند، پنج هزار آنان را گفته می‌توانیم که کودکان تشکیل می‌دهند، پنج هزار دیگر را نیز گفته می‌توانیم که نوجوانان تشکیل می‌دهند و متباقی مردان می‌باشند".
ریاست صحت عامه ولایت بدخشان می‌گوید که افزایش اعتیاد در میان زنان و کودکان به یک چالش بزرگ مبدل شده است.
مقام‌های این ریاست می‌گویند با آنکه از آغاز سال روان هجری ـ خورشیدی تاکنون ۱۵۰۰ معتاد درمان شده اند، اما این رقم کاهشی در شمار معتادان ایجاد نکرده است.