الکساندر لپین، فرمانده قوای مرکزی روسیه گفته است که قرار است نظامیان روس، به شمول نیروهای ویژۀ عملیاتی آن کشور در نیمۀ دوم ماه نومبر در تاجیکستان تمرینات نظامی را انجام دهد.
به نقل از خبرگزاری تاس روسیه، این مقام نظامی گفته است که تمرینات نیروهای ویژۀ این کشور در تاجیکستان به خاطر نگرانی از بدتر شدن وضعیت امنیتی در افغانستان برگزار می‌شود.
آقای لپین روز دوشنبه هشتم نومبر (۱۷ عقرب) گفت: "وضعیت در افغانستان به سرعت و به گونۀ آنی رو به وخامت گذاشته است. ما بیش از ۲۰ تمرین عملیاتی و تکتیکی در تاجیکستان داشتیم که از قبل برنامه ریزی نشده بود."
او وسعت این تمرینات نظامی و نیز شمار نیروها و تجهیزات شامل در آن را فاش نکرد، اما با اشاره به تمرینات مشترک نظامیان روسیه در تاجیکستان از ماه اگست تا اکنون گفت که تمرین‌های نظامی نیروهای ویژۀ روسیه آخر کار نخواهد بود.
پایگاه نظامی ۲۰۱ روسیه که در شهرهای دوشنبه و باختر تاجیکستان مستقر است، بزرگترین تاسیس نظامی روسیه در بیرون از مرزهای آن کشور است که وسایط زرهدار، توپچی، واحدهای کشفی، جزوتام‌های دافع هوا و مبارزه با اسلحۀ کیمیایی و بیولوژیکی در آن مستقر است.
بر اساس توافقی که میان روسیه و تاجیکستان در اکتوبر ۲۰۱۲ امضا شد، نظامیان روسیه تا سال ۲۰۴۲ در تاجیکستان مستقر خواهند بود.
نظامیان کشورهای عضو سازمان پیمان امنیت جمعی که جمهوریت‌‌های پیشین اتحاد جماهیر شوروی اند، در ماه گذشته میلادی تمرینات مشترک نظامی را در تاجیکستان برگزار کردند.
به دنبال بدتر شدن روابط تاجیکستان با حکومت طالبان، مسکو هشدار داده است که در صورت انجام هر گونه حمله از خاک افغانستان بر تاجیکستان، روسیه از دوشنبه حمایت خواهد کرد.