رییس جمهور تاجیکستان امروز ۲۴ مارچ (پنجم حمل) در صحبت تلیفونی با ولادیمیر پوتین، رییس جمهور روسیه، حملهٔ هفتهٔ گذشته در مسکو را تقبیح کرده و به وی گفت که "تروریست‌ها ملیت ندارند."
این در حالی است که رسانه‌های مرتبط با ارگان‌های امنیتی و یک قانونگذار روسیه اتهام وارد کرده اند که حمله‌کنندگان مظنون بر سالون کنسرت مسکو، شهروندان تاجیکستان بودند.
تازه‌ترین آمار حاکی از آن است که کم از کم ۱۳۳ نفر در این حمله کشته و افزون بر ۱۰۰ نفر دیگر زخمی شده اند.
بر اساس اعلامیهٔ ریاست جمهوری تاجیکستان، در جریان این صحبت تلیفونی، امام علی رحمان به پوتین گفت: "تروریست‌ها هیچ نوع ملیت، وطن و دین ندارند."
مقامات روسیه تا اکنون در مورد هویت مظنونین بازداشت شده معلومات نداده اند. اما دوشنبه اتهامات و گزارش‌هایی را رد کرده است که گویا شهروندان این کشور در این حمله دخیل بودند.
کرملین امروز گفت که این دو رهبر بر تشدید تلاش‌های مشترک مبارزه با تروریزم توافق کردند.
وزارت خارجهٔ تاجیکستان روز شنبه گفت که گزارش‌ها در مورد دخیل بودند شهروندان این کشور در حملهٔ مسکو "جعلی" است.
وزارت داخلهٔ تاجیکستان نیز گفته است که رسانه‌های روسی از تاجیکستانی‌هایی به عنوان دست اندرکاران این حمله نام برده است که به گفتۀ این وزارت، در زمان وقوع حمله، این افراد در داخل تاجکستان حضور داشتند.
پوتین روز گذشته گفت که در ارتباط به حملهٔ روز جمعه ۱۱ نفر، به شمول چهار فرد مسلح مظنون، بازداشت شده اند. او افزود که این افراد تلاش داشتند وارد خاک اوکراین شوند.
گروه داعش مسوولیت این حمله را پذیرفته است، اما مقامات روسی به گونهٔ علنی در این مورد چیزی نگفته اند.