شوکت میرضیایف، رییس جمهور اوزبیکستان، روز دوشنبه هشتم می (۱۸ ثور) خواستار برگزاری انتخابات زودهنگام ریاست جمهوری در ماه جولای سال روان شد.
این در حالی است که رای شهروندان اوزبیکستان هفتۀ گذشته به همه‌پرسی رای دادند که بر اساس آن میرضیایف می‌تواند برای دو دور هفت سالۀ دیگر، یعنی تا سال ۲۰۴۰ رییس جمهور اوزبیکستان باشد.
اما ناظران بین‌المللی این همه‌پرسی را که روز یکشنبه ۳۰ اپریل (دهم ثور) برگزار شده بود، ناقص خوانده و گفته اند که مخالفان حکومت در این رای‌گیری مشارکت گسترده نداشتند.
دفتر ریاست جمهوری اوزبیکستان گفته است میرضیایف با صدور فرمانی نهم جولای را تاریخ برگزاری انتخابات زودهنگام تعیین کرده است.
میرضیایف روز دوشنبه بار دیگر از نتایج همه‌پرسی اخیر در آن کشور استقبال کرد و گفت که این رای‌گیری نشان داد که "شعور سیاسی، فرهنگ قانون‌مداری و بینش‌جهانی مردم ما رشد کرده است."
سازمان همکاری و امنیت اروپا با نشر بیانیه‌ای گفته است: "از رهگذر تخنیکی برای همه‌پرسی قانون اساسی در اوزبیکستان آمادگی خوبی گرفته شده بود و به عنوان اقدامی برای ترویج حقوق و آزادی‌های گونه گون اشتهار خوبی از آن صورت گرفته بود، اما این همه‌پرسی در محیطی برگزار شد که عاری از کثرت‌گرایی و رقابت واقعی سیاسی بود."
با آنکه رییس جمهور میرضیایف در طول تصدی ریاست جمهوری خود یک سلسله تغییرات را در اوزبیکستان ایجاد کرده است، منتقدان حکومت و گروه‌های حقوق بشر می‌گویند که اوزبیکستان هنوز هم یک نظام خودکامه دارد.
میرضیایف که پس از اسلام کریموف، دیکتاتور پیشین اوزبیکستان، به قدرت رسید، خود را به عنوان یک چهرۀ ترقی‌خواه جلوه می‌دهد، هر چند وی در زعامت کریموف برای مدت ۱۳ سال صدر اعظم اوزبیکستان بود.
فعالان حقوق بشر به این باور اند که نقض حقوق بشر در اوزبیکستان همچنان ادامه دارد و مقام‌های آن کشور نمی‌گذارند مخالفان سیاسی در برابر حکومت قد بلند کنند.