ضمیر کابلوف، نمایندهٔ ویژهٔ روسیه گفته است که حکومت تاجیکستان از تلاش طالبان در زمینهٔ مبارزه با مخدرات و دهشت‌افگنی راضی نبوده و به این باور است که کارکرد طالبان درخور ستایش نیست.
به نقل از خبرگزاری تاس روسیه، کابلوف با اشاره به نشست اخیر فارمت مسکو برای افغانستان گفته است که "اکثر شرکت کنندگان از تلاش‌های طالبان برای مقابله با داعش راضی بوده" و طالبان را به ادامهٔ این تلاش ترغیب کردند چون به سود امنیت منطقه است.
اما کابلوف گفت: "شرکای تاجیکستانی ما بسیار از افغانستان انتقاد کردند – این برداشت رهبری تاجیکستان است – آنان به این باور اند که طالبان هیچ کار درخور ستایش انجام نداده اند."
با اینحال، نمایندهٔ ویژهٔ رییس جمهور روسیه در امور افغانستان گفت که سایر شرکت کنندگان نشست فارمت مسکو با این برداشت تاجیکستان مخالف بودند.
نشست دو روزهٔ مشورتی فارمت مسکو برای افغانستان که در آن نمایندگان چین، هند، ایران، قزاقستان، قرغیزستان، پاکستان، روسیه، ترکمنستان، اوزبیکستان و سرپرست وزارت خارجهٔ حکومت طالبان شرکت داشتند، روز جمعه ۲۹ سپتمبر (هفتم میزان) با تاکید بر ایجاد حکومت فراگیر قومی – مذهبی، مبارزه با گروه‌های هراس‌افگن و تامین حقوق زنان در افغانستان پایان یافت.
در اعلامیهٔ پایانی این نشست، با وصف انتقاد از طالبان به خاطر تشکیل ندادن حکومت فراگیر در افغانستان، از کارکرد این گروه در زمینهٔ "مبارزهٔ جدی" با داعش و کشت، تولید و قاچاق مخدرات در افغانستان قدردانی شده است.
کابلوف می‌گوید که نمایندهٔ تاجیکستان به دلیل اختلاف نظر با سایر شرکت کنندگان این نشست، نخواست که نام کشورش در اعلامیهٔ پایانی نشست فارمت مسکو درج شود. او گفت: "ما موضع‌گیری ملی این متحد خود [تاجیکستان] را احترام گذشته و با پیشنهاد شان موافقت کردیم."
یک هفته پیش از برگزاری نشست فارمت مسکو،امام علی رحمان، رییس جمهور تاجیکستان، در مجمع عمومی ملل متحد گفت که در دو سال گذشته، قاچاق مواد مخدر، به ویژه از افغانستان، به طور چشمگیر افزایش یافته است.
او گفت که تاجیکستان در این مدت بیش از ۱۰ تن مواد مخدر را در مرز این کشور ضبط کرده که در مقایسه با سال‌های قبل، افزایش چند برابر را نشان می‌دهد.
دو ماه پیش، سازمان ملل متحد با نشر گزارشی گفت که افغانستان به یکی از بزرگترین تولید کنندگان متامفتامین و هیرویین مبدل شده است که بیشتر این مخدرات به بیرون از مرزهای آن کشور قاچاق می‌شود.
با اینحال، مقام‌های طالبان ادعا دارند که به دستور هبت‌الله آخندزاده، رهبر گروه طالبان، حکومت این گروه "اقدامات سازنده و مثمر" را روی دست گرفته که در نتیجهٔ آن کشت و تولید مواد مخدر در افغانستان "به صفر" رسیده است.
گروه