شماری از باشنده گان منطقه سرای شمالی شهر کابل می‌گویند که حدود سه هفته پس از جمع‌آوری معتادان، ده‌ها معتاد دوباره به این منطقه برگشته اند.
آنان می‌گویند که این معتادان در دزدی‌ها دخیل اند و با استعمال آزادانه مواد مخدر سبب افتادن نوجوانان در دام اعتیاد می‌شوند.
احمد فرشاد یکی از دُکاندار منطقه سرای شمالی می‌گوید "بعد از ساعت ۷ شام هیچ کسی به سوی تپه رفته نمی‌تواند. معتادان با چاقو پول رهگذران را می‌گیرند. چند وقت پیش، آنان پول‌های مرا نیز به زور گرفتند".
عبدالوصیل، یکی دیگر از باشنده گان محل می‌گوید که معتادان به نظافت خویش رسیده گی نمی‌کنند و سبب انتقال امراض مختلف می‌شوند.
او گفت "اگر دولت به جمع‌آوری دوباره معتادان از اماکن عمومی اقدام نکند، ممکن که مردم این محل به بیماری‌های گوناگون مبتلا شوند".
حدود سه هفته پیش، وزارت صحت عامه افغانستان با همکاری پولیس کابل، ده‌ها معتاد را از تپه سرای شمالی جمع‌آوری و به مراکز ترک اعتیاد انتقال داده بود.