یک شهروند چین در حملۀ فرامرزی از افغانستان بر تاجیکستان کشته شد – منابع

یک شهروند چین در یک حملۀ فرامرزی از افغانستان بر ناحیۀ مرزی شمس‌الدین شاهین تاجیکستان کشته و پنج نفر دیگر به شمول چهار شهروند چین در این رویداد زخمی شدند.

دو منبع آگاه از تحقیقات دولتی تاجیکستان در پیوند به این رویداد روز دوشنبه ۱۸ نومبر (۲۸ عقرب) به بخش تاجیکی رادیو اروپای آزاد/ رادیو آزادی گفت که این حمله توسط مردان مسلحی صورت گرفت که از افغانستان وارد این ساحۀ مرزی تاجیکستان شده بودند.

تا هنوز انگیزۀ این رویداد مشخص نیست و هویت مهاجمان نیز شناسایی نشده است که آیا آنان احتمالاَ قاچاقبران مواد مخدر بوده اند یا اعضای کدام گروه تندرو. قاچاقبران مخدرات در این ساحۀ مرزی میان افغانستان و تاجیکستان فعال اند.

یک منبع به رادیو اروپای آزاد/رادیو آزادی گفت: "در میان پنج نفر از زخمی شدگان، چهار شهروند چین و یک باشندۀ محلی شامل اند. تمام آنان در شفاخانۀ ناحیۀ شمس‌الدین شاهین بستر شده اند."

بر اساس گزارش‌ها، این شهروندان چین در یک معدن طلا در ساحۀ تنگۀ زربزی که در ناحیۀ شمس‌الدین شاهین واقع است، سرگرم کار بودند. این نخستین مورد حمله بر شهروندان چین در این ساحۀ ناآرام مرزی تاجیکستان است.

ناحیۀ شمس‌الدین شاهین تاجیکستان با ولایت بدخشان افغانستان هم‌مرز است که اغلباً قاچاقبران مخدرات و گروه‌های تندرو در این مرز تردد دارند.

با آنکه طالبان به کشورهای همسایۀ افغانستان اطمینان داده اند که از این کشور هیچ گونه فعالیت تروریستی متوجه همسایگان نخواهد بود، در سه سال گذشته که طالبان بر افغانستان حاکم شده اند، مقام‌های تاجیکستان در مرزهای این کشور با افغانستان دستور احضارات بلند را داده اند.

تاجیکستان به گونۀ ویژه از گسترش دهشت افگنی برخاسته از افغانستان همواره ابراز نگرانی کرده و کشورهای همسایۀ افغانستان را به اتخاذ رویکرد هماهنگ منطقه‌ای برای رسیدگی به این وضعیت ترغیب کرده است.

سازمان کشورهای مستقل مشترک‌المنافع که تاجیکستان عضویت آن را دارد، هفتۀ گذشته از پیشنهاد ایجاد کمربند امنیتی در اطراف افغانستان، برای جلوگیری از گسترش تروریزم از آن کشور به منطقه، حمایت کرد.

طرح ایجاد کمربند امنیتی در افغانستان برای بار نخست در جنوری ۲۰۲۲ از سوی امام علی رحمان، رییس جمهور تاجیکستان، در نشست ویژۀ سازمان پیمان امنیت جمعی در شهر دوشنبه پیشکش شد. او گفت که با توجه به افزایش تهدیدهای امنیتی برخاسته از افغانستان، باید کشورهای منطقه "کمربند امنیتی" را در اطراف افغانستان ایجاد کنند.